Baztango herriak

Zigan aipatzekoa da plazaren edertasuna, elizaren sarrera monumentalaz eta etxe ederrez inguratuta baitago.

Ziga eta Zigaurre artean Baztango begiratokia dago; bertatik, ibarraren iparralde osoa bere ederrean agertuko zaigu.

Zigako eliza San Lorentzoren ohoretan eraiki zuten, 1593tik eta 1603ra bitartean. Aitzinalde izugarriak forma herreratarrak uzten ditu agerian. Nafarroan dagoen estilo herreratarraren eredurik garbiena da.

Herriko bestak abuztuaren 10ean ospatzen dira, herriko zaindari San Lorentzoren ohorez.

Zigak auzo bat du: Zigaurre, eta bertatik gertu kokatzen da Baztango begiratokia.

Baztango behatokia



Iruñetik gatozela, Almandozera garamatzan saihesbidea hartzen badugu, eta, behin herria zeharkatu eta biaduktua behetik iragan eta gero, N-121 errepidea utzi eta Iruritara garamatzan bigarren mailako bidean sartuko gara. Berroeta, Aniz eta Zigatik pasatu ondoren, Baztango Behatokian izanen gara; errepidearen ondoan, hain zuzen ere.

Balkoi ttipi horretatik, Irurita, Lekaroz, Gartzain, Elizondo eta herriak ikusiko ditugu, baita Zigaurre (Ziga), Etxarri eta Aitzano (Gartzain) auzoak ere.

Herrien gainetik, ordea, paisaia naturala bera nabarmentzen da, baserri eta borda (azienda babesteko) aunitz ageri baita hegietan eta mendietan barreiaturik. Soro eta larreak ere ikusiko ditugu, baita pagadi, harizti, iraleku eta urriztiak ere. Erreka-bazterretan, berriz, makalak, haltzak, sahatsak eta lizarrak nabarmentzen dira gehien behatokitik.

Azken batean, bisita egokia eta polita Baztan ezagutzeko, baita bertako klima ozeanikoa, kontraste topografikoak eta paisaia berdea (borda eta baserri ugariz josia) ikusteko ere.