Arizkunek lau auzo ditu: Aintzialde, Bozate, Ordoki eta Pertalats.

Arizkunek Erdi Aroko bi dorretxe ditu (plazan zegoen hirugarren dorretxea XX. mendean bota zuten).

Ursuako jauregia (Bozate auzoa). Leinu-etxea. Erdi Aroko arma-dorrea, Nafarroako nobleziaren sortetxerik zaharrenetako bat. Kondairaren arabera, dama eder bat, Iparraldeko Lantain etxeko alaba, Ursua jauregiko oinordekoarekin ezkondu zen. Ezteietan, andrea haurdun zegoela ohartu zen senarra. Senarrak lotara joan aitzin jauregiko ermitara joan behar zutela erran zion. Etxeko atarian andrea iraindu, ezkontza-jantzia soinetik kendu, eta zetazko zapi batez ito zuen. Ondoren, zaldia hartuta, Frantziara ihes egin zuen. Batzuek erraten dute zaldiak ferrak atzekoz aurrera iltzatuak zituela, ihesaren arrastoak nahastearren.

Bergara jauregiak itxura oldarkorra eta gerrarakoa du. Gezileihoak eta leiho mainelatuak ditu.

Nabarmenak dira Etxeberria etxea (Bozate auzoa), gaur egun erlijio-erakunde baten esku, eta Iturraldea jauregia; aipatzekoa da etxearen teilatu-hegala; izan ere, hegalkin berezia du, hiru gorputzekoa.

Erlijio-eraikinetan, Aingeruen Ama Birjinaren komentua da aipatzekoa. XVIII. mendeko eraikina da, eta armarri guztiz ederra du harrizko fatxada barrokoan. Orobat, aipatzekoa da San Joan Bataiatzailearen eliza, harrizkoa.

Herriko bestak ekainaren 24an dira, herriko zaindari San Joan Bataiatzailearen ohoretan. Arizkungo inauteak oso famatuak dira, baita ondare etnografiko gisa ere.

Gamioxarreko dolaretxea

Orain dela urte batzuk, dolaretxea txukundu eta lehengoratu zuten. Gamioxarreko dolarea XVIII. mendeko dolarea da (dolare barrokoa). Urtero, Jo ala Jo elkarte kulturalak Kirikoketa besta antolatzen du (udazken aldera, sagarra jasotzen den aroan), sagardoa lehenago nola egiten zen ikusteko.

Arizkungo etxe hau dolaretxea da, baina horrez gain, sagastia ere mantentzen du. 

 Badaude bisita gidatuak dolarea ikusteko.

Informazio gehiago: 667 050 264

Santxotena Parke-Museoa

 

Naturarekin harremanetan eta Bozateko auzoan, Xabier Santxotena artistak gonbit egiten digu atari zabalean egin duen museoa ezagutzera. Leku honetan, euskal mitologia biziberritu egiten da zuraren bitartez. Santxotenak era askotako pertsonaiak lantzen ditu eta denak daude paisaiak eskaintzen dizkigun berdetasun mota ororekin ederki uztartuak.

Oinez egiteko moduko zirkuituak bordaz borda gidatuko zaitu eta minusbaliatuendako moldatua dago. Bordak Pirinioetako artzainak bizi eta aterpetzeko eraikuntzak dira; hemen, berreginak daude Santxotenaren zurezko tailuak gordetzeko. Gaiari dagokionez, nagusiki euskal mitologiari lotua dago. Bilduman ageri diren irudi aunitz lamiak dira; hau da, arrain gorputza duten emakumeak. Halaber, mikeldiak ageri dira, hots, pertsonaia totemikoak.

Nola iritsi - mapa

Iruñetik 57 km-ra dago. Herrira heltzeko, N-121-B errepidea hartu behar da. Elizondo eta Elbete zeharkatuta, “Arizkun” adierazten duen bidegurutzea topatuko dugu, eskuinaldera.

Argazki galeria